Unnuk Kulturisiorfik siulleq pivoq ukioq 2001. Nunatta Atuagaateqarfiata suliniuteqarneratigut isumassarsiaq aallartippoq, nuummilu suliffeqarfiit peqatigiiffiillu isumassarsiaq tigulluarpaat. Maannakkullu Unnuk Kulturisiorfik ukiut tamaasa pisarpoq aammalumi sinerissami ingerlanneqartarlersimalluni.

Aallartinneraniilli Nunatta Atuagaateqarfia aaqqissuussamut ataqatigiissaarisutut ingerlasimavoq ukiullu tamaasa suliffeqarfiit peqatigiiffiillu 40-niik 50-it tungaannut Unnuk Kulturisiornermut peqataasarput.

Unnuk Kulturisiorfik tamatigut januaarimi arfininngorneq kingulleq ingerlanneqartarpoq, ukioq mannalu arfininngorneq januaarip 23-at ingerlanneqassalluni.